சுகமான தவிப்பு

சுகமான வாசனை - என்
சொர்க்கத்தின் வாசனை
எண்ணி எண்ணி
ஏங்க வைக்கும் - என்
இதயத்தின் வாசனை
நித்தம் நித்தம் வேண்டும்
உன் முத்தத்தின் வாசனை!

கண்ணைத் தோண்டி
காட்டில் விட்டாலும் -உன்
மணம் கண்டு ஓடி வருவேன்!

என்னை செவிடாக்கி
அலைய விட்டாலும் -உன்
குரல் கேட்டு
நீ இருக்கும்
திசை பார்த்து தேடி வருவேன்!

கனவுக்குள் கண்டுகொண்ட
கள்வனை காதலன் என்று
சொல்லலாம் -என்
உயிருக்குள் கண்டு கொண்ட
உன்னை என் உயிரென்று
சொல்லாமல் வேறு
என்னவென்று சொல்வது!

ஊமையான என் நெஞ்சம்
உன்னால் தான்
ஓயாத இன்பங்களை
சொந்தமாக்கியது!

நான்
பேராசைக்காரியும் அல்ல
கொடுமைக்காரியும் அல்ல
சின்னச் சின்ன
சந்தோசங்களுக்காக
ஏங்கும் ஒரு
பைத்தியக்காரி!